06/11/2009

1 Histwêre: nos vîs cousins (Daniel Oger (Saint-Germain / Sint-Djèrmwin) - Jean Ducat)

in : CW, 3/2009, p.90-91

Nos vîs cousins, lès Walons do Wisconsin (2)

(Saint-Germain - Sint-Djèrmwin)

 

Douvint qu' c' èst vêla qu' tos lès Bèljes alîn' ?

 

Dins l' lingadje dès-Indyins, « Wisconsi » vout dîre : « payis dès-êwes ». En 1848, il a div'nu on-ètat d' l' Amèrike èt Green Bay ènn' èsteûve li pus grand pôrt, su l' lac Michigan. Li vile a faît imprimer one masse di rèclames po fé v'nu lès djins d' pa-t't-avau tos lès payis. One banseléye di cès papîs-là a arivé à Anvèrs èt il ont stî spaurdus dins nos viladjes. On-z-î d'djeûve qu'on--zî p'leûve acheter fwârt bon martchi brâmint dès bounès têres.

 

Quand nos djins arivîn' vêla, i l'zeû faleûve comincî pa trover one têre qui n' èsteûve co à person.ne. Adon, i l’ alîn' fé èrèdjistrer è bûrau dès têres èt do min.me côp d'mander po div'nu Amèrikins. On n' payeûve li têre qu' après cink anéyes qu' on vikeûve dissus.

 

Li prumî ovradje, c' èsteûve di côper lès-aubes qu' on vindeûve à l' sôyerîye, pwîs rauyî lès racènes èt-z-è fé one têre di culture. I 'nn' avîn' po chîj ans divant d’ p'lu c'mincî à sèmer.

 

Lès-awous' èstîn' bounes èt on p'leûve co gangnî saquants caurs è vindant dès racènes di ginseng, one plante qui done dès fwaces aus djins qui sont-st-one miète flauwes.

 

Et pikote à migote, i plîn' acheter dès bièsses, dès machines èt dès novèlès têres. Dès-ôtes di nos djins èstîn' omes di mèstî: mon.nîs, boskiyons, cwamejîs, mârchaus, sabotîs...

 

Lès-èfants alîn' dins dès scoles di ma-chére-seûrs pace qu' èles costîn' aus comunes trwès côps mwins' tchêr qui lès maîsses. A doze ans, c' èsteûve tot: lès-èfants èstîn' mètus à l'ovradje.

 

Tos l's-ans, après l'awous', c' èsteûve li fièsse di l'awous'. Après mèsse, on s' rachoneûve po fé one grande rinchinchote. Lès feumes avîn' apontî dès masses d' amougnî è chûvant dès r'cètes d' èmon nos-ôtes: djote, canadas, vète tripe, quèwètes. On fieûve dischinde tot ça avou dè l' bîre qu'on-z-aveûve faît li-min.me.

Pô fini, on-z-apwârteûve li taute bèlje: one coûtche di côrin avou de stofé au-d-dizeû. On fieûve dè l' musike jusqu'à iût' eûres à l' nêt èt adon tot l' monde tchanteûve li dêrène tchanson: "Nos-èrîrans planter dès canadas avou Marîye Doudouye". One musike qui n' èsteûve nin gaîye, èt qui v'leûve dîre qu'on-z-aleûve ritrover l' deur ovradje di tos lès djoûs.

 

Au djoû d'audjoûdu, i n' dimeûre qu'one place qu' on-z-î faît co one parèye fièsse, mins èle dure deûs djoûs: li "Belgian day", (li doûrnéye bèlje, si vos v'loz) au mitan do mwès d' julèt', dins one vile qu'on lome "Brussels". Li « district of Namur » a stî classé pa l' gouvèrnèmint amèrikin come place qui mostère li mia l' istwêre dès djins qu'ont v'nu d' Bèljike.

 

Daniel OGER

 

(trové dins: Jean Ducat, «Namurois au Nouveau Monde», NDLR. : la première partie de ce document a paru dans notre n°3 (mars-avril 2009).

11:01 Écrit par justitia & veritas dans Général | Lien permanent | Commentaires (0) |  Facebook |

Les commentaires sont fermés.